Του Γ. Ανδρεάδη:
Σα Καιλάρια εξ μερέαν σο χωρίον, ημέραν Παρασκευήν, έρθεν σον Κωστίκαν χαρτίν ασήν εφορίαν. Από ΔΟΥ Πτολεμαΐδος: "Να περάσετε δια έλεγχον υποθέσεώς σας την Δευτέραν το πρωΐ, από το γραφείο του Διευθυντού."
Αείκον χαρτίν καμμίαν πα κι έρθεν και ο Κωστίκας πολλά εστεναχωρεύτεν, άμα την γαρήν ατ την Παρθένα δεν κι είπεν, για να μην στεναχωρεύκεται. Παρασκευήν, Σάββαν και Κερεκήν ο Κωστίκας ομμάτ κι εσπάλτσεν κι ασήν στεναχώριαν ατ να σπαν. Την Δευτέραν εσκώθεν σύννυχτα, ελούστεν, εξυραφίεν, εσέγκεν το κοστούμν ατ το καλόν κι εσέβεν σον δρόμον να πάει με τα ποδάρια σα Καιλάρια. Ζατίμ πέντε χιλιόμετρα μακράν έτον το χωρίον ατ ασήν πολιτείαν.
Σον δρόμον ντο εσέβεν ερούξεν απάν σον ξάδελφόν ατ τον Γιωρίκα. Ο Γιωρίκας πα είδεν τον Κωστίκαν με το καλόν το κοστούμ και αρωτάει ατόν.
Κωστίκα, οσήμερον έξαργος εν κι εσέγκες το κοστούμι σ';
Ο Κωστίκας, είπεν τον μπελιάν ατ με το χαρτίν τη εφορίας σον Γιωρίκαν, και ο Γιωρίκας εκλώστεν και λέει ατόν.
Ναίπαι Κωστίκα γιαμ επαλαλώθες; Για αείκον δουλείαν πας σα Καιλάρια κι εσέγκες καλόν κοστούμ; Θα εθαρρούν ζεγκίντς είσαι και θα κοφτνε τα ποδάρια σ'. Δέβα βάλον παλαία λώματα, να εθαρρούν εφτωχός είσαι, μπελκι τζουζ η ψύ ατούν.
Ο Κωστίκας ενούντσεν ενούντσεν τυ Γιωρίκα ο λόγος ορθόν έτον, εκλώστεν σ' οσπίτ, εξέγκεν το κοστούμν ατ και εφόρεσεν τυ χωραφί τα λώματα. Ασό χωρίον εξ κι εξέβεν ευρλεθεν εμπροστά τ' ο φίλος ατ ο Χαρίκον.
Ναίπαι Κωστίκα, λέει ο Χαρίκον, ντ' έπαθες κι εχπάστες σο χωράφ, ακόμα ο ήλιεν κι εξέβεν;
Αλλο μίαν κι άλλο ο μαύρον ο Κωστίκας είπεν το ζορ ντο είσεν με την εφορίαν σον Χαρίκον. Έξεν ο Χαρίκον κι εκλωστεν και λέει ατόν.
Ναίπαι Κωστίκα για αείκον δουλείαν πας σα Καιλάρια και εφόρεσες λώματα άμον γυρευός; Θα ελέπνε σε και θα εθαρρούνε τσιπλάκς είσαι και ξάι κι θα σαέβνε σε.
Ο Κωστίκας ενούντσεν ενούντσεν ντο είπεν ο Χαρίκον κι άμον ορθά εφανθαν τα λόγια τ'.
Εκλώστεν οσπιτ , αμάν εσασούρεψεν ντο να φορεί και πάει σα Καιλάρια. Η γαρή νατ εφνέφσεν και είπεν ατόν.
Ναίπαι Κωστίκα ντο έπαθες και πας έρχεσαι να αναλλάεις τα λωματα σ';
Ατότες ο Κωστίκας είπεν ση γαρήν ατ ντο πελιάν ερούξεν απάν σο κιφάλν ατ'.
Η Παρθένα εκλωστεν και λέει ατον.
Να λέω σε Κωστίκα ντο είπεν η μάναμ οντας επαντρέψαμεν την βραδύν ντο θα εκοιμούμνες εντάμαν. Ερώτεσα τη μάναμ - λαφρύν το χώμαν ατς - απόψ ντο θα κοιμούμαι με τον Κωστίκαν εντάμαν, το κόκκινον γιόκσαμ το μαύρον βρακίν να φορώ;
και η μάναμ είπε με
Παρθένα, ίντιναν βρακίν να φορείς ο Κωστίκας θα γαμεί σε.
Σχόλιον: γράφει ο aris53m
Συμπέρασμα: Όντες πάτε σην εφορίαν φοράτε ίντινα λώματα ευρύουνταν εμπροστά σας.
No comments:
Post a Comment